Rai-manas maka'as halo nasaun oioin hosi Europa osidental iha alerta mean
Temperatura sira sei aumenta nafatin iha loron-kuarta ne'e iha Europa osidental, ne'ebé nasaun oioin iha ona alerta mean tanba laloran manas nian ne'ebé sei to'o valor rekord ida iha sidade balun.
Iha Fransa, kuaze hosi rejiaun tomak iha ona alerta manas nian, hafoin rekord foun ida estabelese ona iha loron-tersa ne'e iha Bordéus 41,2ºC (grau Celsius).
Iha kapital franseza, Paris, serbisu meteorolójiku sira kalkula ba loron-kinta temperatura ne'ebé aas liu iha tinan 70 ikus ne'e: 41ºC.
Maibé, rekord iha nível nasional karik seidauk to'o iha loron hirak tuirmai: halakon ona iha final fulan-Juñu, ho 46°C iha súl Fransa nian.
Viziña Béljika, ne'ebé hein rekord absolutu iha loron hirak tuirmai, fó sai ona ba dala uluk alerta mean ida tanba rai-manas.
Serbisu meteorolójiku belga sira kalkula 38ºC iha nordeste nasaun nian, ne'ebé rekord istóriku akontese iha fulan-Juñu 1947.
Tanba rai-manas maka'as, maioria hosi serbisu sira iha sidade Bruxelas sei taka iha tuku 13:00 iha loron-kuarta ne'e, loron-kinta ho loron-sesta.
Iha Flandres Osidental, governador dekreta ona iha loron-tersa proibisaun fuma iha área natural sira hosi provínsia marítimu ne'e hodi evita inséndiu sira.
Autoridade sira hosi Reinu Unidu hatete mós katak hein rekord absolutu iha loron-kinta. "Karik ami sei hetan rekord hosi rai-manas ho 36,7°C iha fulan-Jullu, no iha posibilidade hanesan hodi halakon rekord absolutu 38,5", hatete hosi serbisu meteorolójiku britániku sira.
Itália mós afetadu ho vaga rai-manas no autoridade sira aumenta ona iha loron-kuarta ne'e alerta ba nível 3 (mean) iha sidade lima: Bolzano, Brescia, Florensa, Perugia ho Turim.
Alerta nível 3 akontese tanba prezensa hosi "kondisaun sira emerjénsia nian ne'ebé bele afeta saúde hosi ema ativu ho saudável sira nian, la'ós de'it hosi subgrupu sira ne'ebé iha risku, hanesan katuas-ferik sira, labarik-ki'ik sira no ema sira ne'ebé iha moras todan", sira esplika.
Fonte: Ajénsia Lusa
